മംഗലാപുരം: കനത്ത മഴ മംഗലാപുരത്തും പരിസരങ്ങളിലും പരക്കെ നാശനഷ്ടം വിതച്ചു. ബണ്‍ഡ്വാളിനടുത്ത് സജിപാല്‍നഡു ഹയര്‍ പ്രൈമറി സ്‌കൂള്‍ നിലംപൊത്തി. സ്‌കൂള്‍ തകര്‍ന്നുവീണത് രാത്രിയിലാകയാല്‍ വന്‍ ദുരന്തം ഒഴിവായി. കുലശേഖരത്തിനടുത്ത് കുന്നിടിഞ്ഞ് വീട് തകര്‍ന്നു. വീട്ടിനുള്ളില്‍ പെട്ട ഗൃഹനാഥനെ പരിക്കുകളോടെ ആസ്​പത്രിയിലെത്തിച്ചു. പല സ്ഥലങ്ങളിലും മരങ്ങള്‍ കടപുഴകി വീണു. ബണ്‍ഡ്വാള്‍ മേഖലയില്‍ കഴിഞ്ഞ 24 മണിക്കൂറില്‍ 49.6 മി.മീ. മഴ ലഭിച്ചതായാണ് കണക്ക്. കനത്ത മഴയില്‍ മലവെള്ളം ഒഴുകിയെത്തിയതോടെ നേത്രാവതി പുഴയിലെ ജലവിതാനം 6.5 മീറ്ററായി ഉയര്‍ന്നു. ഈ മേഖലയില്‍ ഈവിധം മഴ തുടര്‍ന്നാല്‍ നേത്രാവതി കരകവിയുമെന്ന അവസ്ഥയാണുള്ളത്.